Rossiya kutubxonalari va muzeylari O‘zbekiston madaniy merosi katalogini oladi.
O‘zbekiston madaniyat vaziri Baxtiyor Sayfullayev muzey va kutubxonalar vakillariga “O‘zbekiston madaniy merosi jahon to‘plamlarida” nashrini olish uchun sertifikatlarni topshirdi.
—Rossiya kutubxona va muzeylariga “O‘zbekiston madaniy merosi jahon to‘plamlarida” nashrining 500 jildi bepul beriladi, — dedi loyiha rahbari, O‘zbekiston elektron ommaviy axborot vositalari milliy assotsiatsiyasi raisi Firdavs Abduxoliqov tadbir doirasida o‘tkazilgan davra suhbatida.
Moskva dekorativ-amaliy sanʼat muzeyida bo‘lib o‘tgan davra suhbatidan so‘ng O‘zbekiston madaniyat vaziri Baxtiyor Sayfullayev muzey va kutubxonalar vakillariga nashrlarni olish uchun sertifikatlarni topshirdi. Har bir kitob-albomga undagi eksponatlar haqidagi film ilova qilinadi.
"Biz ushbu aksiya vositasida bugungi kunda O‘zbekiston Prezidenti Shavkat Mirziyoyev boshchiligida madaniy merosni asrab-avaylash, maʼrifat va taʼlim-tarbiya sohasida amalga oshirilayotgan ishlarni qo‘llab-quvvatlamoqchimiz, – dedi Abduxoliqov.
Uning qo‘shimcha qilishicha, “O‘zbekiston madaniy merosi jahon to‘plamlarida” loyihasi doirasida rossiyalik mutaxassislar bilan hamkorlikda tayyorlangan besh jildlik kitob-albomlar hozirda nashr etilgan, joriy yilning dekabrigacha yana besh jildi chop etilishi rejalashtirilgan. Fransiya, Buyuk Britaniya, Germaniya, Chexiya, Yaponiya, AQSH kabi dunyoning 12 ta davlatida o‘zbek madaniyati namunalarini kataloglashtirish ishlari olib borilmoqda.
"Biz ushbu loyiha atrofida birlashgan barcha mutaxassislarga: muzeylar direktorlari va xodimlariga, ekspertlar hamjamiyatiga minnatdorlik bildiramiz. Chunki ular bizga noyob loyihada yordam berishmoqda. Bu dunyodagi yagona loyiha bo‘lib, xalqimizning madaniy merosini yagona katalogga jamlaydi. Bugunga qadar biz joriy yilning aprel-may oyida Toshkentda bo‘lib o‘tgan “O‘zbekiston madaniy merosi – xalqlar va mamlakatlar o‘rtasidagi muloqotga yo‘l” kongressida besh jildni taqdim etgan edik, – dedi Abduxoliqov.
Davra suhbatida Ermitaj, Tretyakov galereyasi, Rossiya Milliy kutubxonasi, Rossiya etnografiya muzeyi, Rossiya Fanlar akademiyasi Sharq qo‘lyozmalari instituti vakillari ishtirok etdi. Shu kuni dekorativ-amaliy sanʼat muzeyida O‘zbekiston eksponatlari ko‘rgazmasi ochildi.
