Матбуот ва ОАВ ходимлари куни муносабати билан Ўзбекистонда хизмат кўрсатган журналист Фирдавс Абдухолиқов “Меҳнат Шуҳрати” ордени билан мукофотланди.
Ўзбекистонда хизмат кўрсатган журналист, ЎзОАВМА Бошқаруви раиси, Ўзбекистонда илк нодавлат телекомпанияга асос солган Фирдавс Абдухолиқов Ўзбекистон Республикаси Президентининг Фармонига биноан “Меҳнат шуҳрати” ордени билан тақдирланди.
Ўзбекистон ҳудудида жойлашган архитектура ёдгорликлари, эпиграфик ёзувларга бағишланган бир неча томлик китоблар, мақолалар Uzbekistan Today томонидан амалга оширилган энг муҳим медиа лойиҳалардан бири бўлди. Шуни таъкидлаш жоизки, мазкур тадбир ҳали ислом дунёсидаги бирорта мамлакатда ўтказилмаган эди. “Ўзбекистон маданий мероси халқлар ва мамлакатлар ўртасида мулоқотга йўл” халқаро Иккинчи конгресси доирасида лойиҳанинг “Ўзбекистон архитектураси эпиграфикаси” китоб-альбоми халқаро илмий ҳамжамиятда катта қизиқиш уйғотди. Чет эллик олимлар ва санъатшуносларнинг фикрича, беминнат тарқатилганкитоблар, бундай лойиҳанинг амалга оширилиши илмий-тадқиқот соҳасида мислсиз ташаббус бўлди.
Маълумот учун:
Фирдавс Абдухолиқов 2007 йилда "Uzbekistan Today" АА таҳририй кенгаши раислигига сайланди, шу билан бирга у Россия телеканаллари билан ҳамкорликда суратга олинган “Ўзбекистон қумликлар дурдонаси”, “Қумликлар вақти аро”, “Ўзбекистон: янги кашфиётлар” каби 20 дан ортиқ ҳужжатли фильмларнинг муаллифи ва продюсери, 30 дан ортиқ ижодий медиа лойиҳаларнинг раҳбари ҳисобланади. Миллий медиа лойиҳалардан “Ўзбекистон архитектураси эпиграфикаси” (13 томлик), “Мустақил Ўзбекистон усталари”, Регистон майдонида 3D форматида намойиш этилган “Ўзбекистон маданий мероси – башарият мулки” каби чироқ-мусиқали намойишларга продюсерлик қилган.
Фирдавс Абдухолиқов турли давлатлардан келган 400 дан ортиқ олимларни бирлаштирган “Ўзбекистон маданий мероси дунё тўпламларида” халқаро эксклюзив мультимедиа лойиҳаси муаллифи ва раҳбари сифатида ҳам яхши танилган. Мазкур лойиҳа доирасида 15 та китоб-альбом ва 20 дан ортиқ ҳужжатли фильмлар яратилган. 2018 йилнинг июнь ойида Россиянинг Санкт-Петербург шаҳрида ўтказилган халқаро Иккинчи конгрессда 30 дан ортиқ мамлакатдан ташриф буюрган олимлар уни бир овоздан Ўзбекистон маданий мероси халқаро ҳамжамияти Бошқаруви раислигига сайлашди.
