Toshkentda bo‘lib o‘tgan Xalqaro ilmiy kongressda “O‘zbekiston madaniy merosi jahon to‘plamlarida” turkumidagi dastlabki beshta kitob-albom taqdimoti bo‘lib o‘tdi.
Poytaxtimizda 15-may kuni “O‘zbekiston madaniy merosi – xalqlar va mamlakatlar o‘rtasidagi muloqotga yo‘l” mavzusidagi Xalqaro ilmiy kongress o‘z ishini boshladi. Ilmiy forumning ikkinchi kuni Samarqand shahrida bo‘lib o‘tadi.
Tadbirda O‘zbekiston hududida yaratilgan va jahon muzeylarida saqlanayotgan noyob moddiy va badiiy madaniyat ob’yektlari haqida ma’ruzalar tinglandi.
Kongressning eng muhim voqeasi- “O‘zbekiston madaniy merosi jahon to‘plamlarida” media-loyihasining taqdimoti bo‘ldi. Uning muallifi va rahbari, Elektron ommaviy axborot vositalari milliy assotsiatsiyasi boshqaruvi raisi - Firdavs Abduxoliqov; ilmiy rahbari O‘zbekiston Fanlar akademiyasi akademigi Edvard Rtveladzedir.
Tadbirda “O‘zbekiston madaniy merosi” turkumidan o‘zbek, ingliz va rus tillarida chop etilgan dastlabki beshta kitob-albom namoyish etildi. Ular Sharq davlat muzeyi (Moskva), Rus etnografiya muzeyi (Sankt-Peterburg), Davlat Tretyakov galereyasi (Moskva)dagi o‘zbek kolleksiyalariga, jahon kolleksiyalaridagi O‘zbekiston gilamlari va kashtalariga (Avstraliya, Kanada, AQSH va boshqalar), Rossiya Milliy kutubxonasidagi Alisher Navoiy qoʻlyozmalariga (Sankt-Peterburg) bag’ishlangan.
Bundan tashqari, Sharq qoʻlyozmalari instituti (Sankt-Peterburg), Davlat Ermitaji (Sankt-Peterburg), Davlat tarix muzeyi (Moskva) kolleksiyalari, jahon toʻplamlaridagi Oʻzbekiston musiqa merosi va O‘zbekiston gilamdo‘zligi haqidagi beshta tajriba- albom taqdim etildi.
Edvard Rtveladze, kongress nafaqat O‘zbekiston, balki butun dunyo ilmiy jamoatchiligi uchun muhimligini ta’kidladi.
– Mazkur kongress- ilmiy, ma’rifiy va tarbiyaviy ahamiyatga ega. Bir necha yillardan buyon O‘zbekiston olimlari olimlar bilan, birinchi navbatda, Rossiya olimlari bilan birgalikda besh jildni nashr etish ustida ishladi... Bu- innovatsion loyiha, uning butun dunyoda o‘xshashi yo‘q. O‘ylaymanki, boshqa davlatlar ham bizdan o‘rnak olsa bo‘ladi”, — dedi akademik.
Uning so’zlariga ko‘ra, O‘zbekiston moddiy va ma’naviy madaniyatining bir qismi saqlanayotgan boshqa mamlakatlar ham bosqichma-bosqich qamrab olinadi. «Bizning olim va emissarlarimiz turli sabablarga ko‘ra vatanimizdan tashqariga chiqib qolgan O‘zbekistonning madaniy merosi, hatto Gavayi orollari, Avstraliya, Kanada, Argentinada ham saqlanishini aniqladi. Asta-sekin bu mamlakatlar va hududlarni qamrab olamiz», - deya ta’kidladi Edvard Rtveladze.
Tadbir ishtirokchilariga jahon muzeylari, ilmiy institutlari va kutubxonalari fondlaridagi O‘zbekiston kolleksiyalari haqidagi hujjatli filmlarning treylerlari namoyish etildi. Loyihaning ijodiy jamoasi dunyoning 15 ta muzeyini suratga oldi va olimlar bilan suhbatlarni yozib oldi.
Kongressda dunyoning 40 dan ortiq davlatidan 140 dan ortiq olimlar, ekspertlar, diplomatlar, xalqaro tashkilotlar vakillari, shuningdek 50 dan ortiq mamlakatimiz ilm-fan namoyandalarini to’pladi.
