2018 yilning 10-11 dekabr kunlari O‘zbekiston poytaxtida madaniyat va sanʼat olamidagi ulkan voqea – “O‘zbekiston madaniy merosi jahon to‘plamlarida” loyihasining “2018 yil yakunlari”, “2019 yil uchun yo‘l xaritasi” xalqaro media-forumi bo‘lib o‘tadi. Prezidentimiz Shavkat Mirziyoyevning O‘zbekiston madaniy merosini asrab-avaylash va yuksaltirish borasidagi tashabbuslarini hayotga tatbiq etishga mamlakatimiz va xorijlik olimlar, fuqarolik jamiyati va ijtimoiy masʼuliyatli biznes vakillari ham qo‘shildi. Aynan shu yilning mart oyida Toshkentda “O‘zbekiston madaniy merosi jahon to‘plamlarida” loyihasining 2018 yilga mo‘ljallangan “Yo‘l xaritasi” tasdiqlangan edi. 10 oy davomida uni amalga oshirish natijalari EOAVMAning Media Xollida sarhisob qilinadi.
Mediaforumning birinchi kuni – 10 dekabrda O‘zbekiston madaniy merosini asrash, o‘rganish va targ‘ib qilish bo‘yicha Butunjahon jamiyatining yig‘ilishi bo‘lib o‘tadi, unda 350 nafar: mahalliy va xorijiy olimlar, xalqaro tashkilotlar vakillari, xorijiy va milliy ekspertlar, muzeylar, kutubxonalar va ilmiy muassasalar rahbarlari, ommaviy axborot vositalari hamda O‘zbekiston madaniy merosini qadrlovchi barcha shaxslar ishtirok etadi.
Germaniya, Chexiya, Rossiya, Yaponiya olimlari va mutaxassislari “O‘zbekiston madaniy merosi jahon to‘plamlarida” turkumidagi kitob-albom va hujjatli filmlarning navbatdagi 10 ta tajriba nashrlarini taqdim etadi.
Forum doirasida Temuriylar tarixi davlat muzeyiga “O‘zbekiston meʼmoriy epigrafiyasi” va “O‘zbekiston madaniy merosi jahon to‘plamlarida” turkumidagi 30 ta kitob, shuningdek, temuriylar buyuk merosining eng nodir qo‘lyozmalari beg‘araz ravishda hadya qilinadi.
Mediaforumning ilk oqshomida Ijtimoiy ahamiyatga molik media-mahsulotlarining X milliy festivali bo‘ladi. O‘zbekistonning turizm salohiyatiga oid eng yaxshi asarlar mualliflari diplom va qimmatbaho sovg‘alar bilan taqdirlanadi. Festival Gran-prisi g‘olibini bosh sovrin – “Spark” avtomobili kutmoqda. Xorijlik ishtirokchilar orasidan eng yaxshi ishtirokchilarga ikki kishilik O‘zbekistonning diqqatga sazovor joylariga vip-sayohat imkoni taqdim etiladi.
Forum mehmonlari va ishtirokchilari O‘zbekistonda to‘ldirilgan, reallikka aoslangan ilk kitob hamda Ipak yo‘li durdonasi – qadimiy Samarqand shahrining madaniy merosini saqlash va ommalashtirish strategiyasi konsepsiyasini muhokama qiladilar.
“O‘zbekistonning 100 ta eng ko‘zga ko‘ringan qo‘lyozma yodgorliklari” nomli noyob va o‘ziga xos loyiha bilan tanishadilar.
Buyuk Britaniya, avstriyalik olimlar va mutaxassislar tomonidan Buyuk Britaniya Milliy kutubxonasida saqlanayotgan “Zafarnoma” nomli noyob qo‘lyozmaning 33 ta miniatyurasining nafis va hashamatli faksimil nashri taqdimoti forumdagi esda qolarli voqea bo‘ladi.
O‘zbekiston madaniy merosini o‘rganish, asrab-avaylash va targ‘ib qilish bo‘yicha Butunjahon jamiyati faoliyatining 2019 yilga mo‘ljallangan “yo‘l xaritasi”ni tasdiqlash bilan media-forum yakunlanadi.
Mediaforum tashkilotchisi – O‘zbekiston elektron ommaviy axborot vositalari milliy assotsiatsiyasi;
Hamkorlar:
– YUNESKOning O‘zbekistondagi vakolatxonasi;
– Turizmni rivojlantirish davlat qo‘mitasi;
- O‘zbekiston Respublikasi Madaniyat vazirligi;
– Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash va rivojlantirish jamoat fondi mablag‘larini boshqarish bo‘yicha parlament komissiyasi;
– O‘zbekiston Respublikasi Vazirlar Mahkamasi huzuridagi Islom sivilizatsiyasi markazi.