Kongress O’zbekiston elektron ommaviy axborot vositalari milliy assotsiatsiyasi tomonidan “O’zbekiston madaniy merosi jahon to’plamlarida” xalqaro multimedia loyihasi doirasida o’tkazilmoqda. Unda dunyoning 30 dan ortiq davlatidan 200 dan ortiq olimlar, ekspertlar, diplomatlar, davlat, jamoat va xalqaro tashkilotlar, ommaviy axborot vositalari vakillari ishtirok etadi. Kongress ishiga O’zbekiston, Avstriya, Buyuk Britaniya, Germaniya, Eron, Rossiya, Polsha, Fransiya, Turkiya, Chexiya, Shvetsiya, Yaponiya va boshqa mamlakatlarning yirik muzey va ilmiy muassasalari rahbarlari va direktorlari, UNESCO, ISESCO, IRSICA, ICOMOS vakillari, taniqli olimlar – akademiklar, professorlar, fan doktorlari jalb etiladi.
Kongressning asosiy tadbiri Rossiya Fanlar akademiyasining Gorkiy nomidagi Olimlar uyida bo’lib o’tadi. Yalpi majlis O’zbekiston arxeologiyasi, tarixi, sharq qo’lyozmalari, numizmatika, to‘qimachilik, amaliy san’at va rassomlik san’atiga oid yettita seksiyali ilmiy munozaralar bilan to’ldiriladi.
Kongress doirasida Rossiya etnografiya muzeyi, Rossiya Fanlar akademiyasi Sharq qoʻlyozmalari instituti, Kunstkamera, Rossiya Milliy kutubxonasi, Din tarixi Davlat muzeyi, Rossiya Fanlar akademiyasining Rus adabiyoti instituti (Pushkin uyi)da madaniy meros va oʻzbek sanʼati asarlari koʻrgazmalari ochiladi.
“O’zbekiston madaniy merosi jahon to’plamlarida” turkumining navbatdagi besh jildli kitob-albomlarining taqdimoti rejalashtirilgan: “Nemis muzeylari to’plami” (Berlin, Bamberg, Drezden, Gamburg, Leypsig, Lyubek, Shtutgart, Herrnhut); "Dinlar tarixi davlat muzeyi kollektsiyasi" (Sankt-Peterburg); “O’zbekiston Davlat san’at muzeyi kolleksiyasi” (Toshkent); “O‘zbekiston gilamdo’zligi: asrlar davomida saqlanib qolgan an’ana” (O‘zbekiston, Rossiya, Ispaniya, AQSh, Kanada); “Movarounnahr san’ati Davlat Ermitaji kolleksiyasida. 2-qism "(Sankt-Peterburg).
Shuningdek, Rossiya, Buyuk Britaniya, Hindiston, Fransiya, Germaniya, Yaponiya, Chexiya muzeylarida O’zbekiston tarixiy merosini asrab-avaylashga bag’ishlangan yangi hujjatli filmlar namoyish etiladi.
Bundan tashqari, loyiha ishtirokchilari “O’zbekiston me’moriy epigrafiyasi” loyihasi doirasida chop etilgan 13 jildlik kitoblar bilan tanishishlari mumkin.
