Poytaxtimizdagi Temuriylar tarixi davlat muzeyida “O‘zbekiston madaniy merosi jahon to‘plamlarida” loyihasi doimiy ko‘rgazmasining tantanali ochilishi bo‘lib o‘tdi.
Tadbir “O‘zbekiston madaniy merosi jahon to‘plamlarida” loyihasining 2018 yildagi faoliyati yakunlari va 2019 yilga mo‘ljallangan “yo‘l xaritasi”ni ishlab chiqishga bag‘ishlangan Xalqaro multimedia forumi doirasida o‘tkazildi.
Muzey zallaridagi “O‘zbekiston madaniy merosi jahon to‘plamlarida” loyihasining doimiy ko‘rgazmasi o‘z faoliyati davomida loyiha tomonidan chop etilgan bosma materiallarni namoyish etadi.
Uning ekspozitsiyasida – “O‘zbekiston madaniy merosi jahon to‘plamlarida” turkumidagi 20 jild kitob-albomlar, “O‘zbekiston meʼmoriy epigrafiyasi” turkumining 12 jildi, hozirda turli xorijiy kolleksiyalarda saqlanayotgan o‘rta asrlarga oid noyob qo‘lyozmalarning faksimilesi, “Kattalangar Qurʼoni”, «Temur tuzuklari», “Zafarnoma”, Husayn Bayqaro devoni», “Merojnoma” shular jumlasidandir.
Kitoblar tashrif buyuruvchilarga ko‘rib chiqish uchun taqdim etiladi. Kelgusida ekspozitsiya nashr etilishi kutilayotgan yangi jildlar bilan to‘ldiriladi.
Ko‘rgazmaning ochilishida O‘zbekiston Respublikasi Bosh vazirining o‘rinbosari Aziz Abduhakimov, YUNESKOning O‘zbekistondagi vakili v.b. Mariya del Pilar Alvares-Lasova, shuningdek, "O‘zbekiston madaniy merosi” multimedia loyihasi muallifi Firdavs Abduxoliqov so‘zga chiqdi.
“O‘zbekiston meʼmoriy epigrafiyasi” va “O‘zbekiston madaniy merosi jahon to‘plamlarida” nashrining 23 jildi Temuriylar tarixi muzeyiga sovg‘a qilingan bo‘lib, tez orada uning ekspozitsiyasidan joy oladi. Katta xalqaro olimlar jamoasi tomonidan yaratilgan ushbu kitoblar mamlakatimiz madaniyatiga qiziqqan har bir kishiga yangi, olamshumuol maʼlumotlarni taqdim etadi”, – deya izoh berdi Aziz Abduhakimov.
O‘zEOAVMA raisi Firdavs Abduxoliqov ko‘rgazmaning, umuman olganda xalqaro forumning ahamiyati haqida gapirar ekan, bu yangiliklarni, eng avvalo, yoshlarga, shuningdek, madaniy merosimizga qiziquvchi mehmonlarga yetkazish ko‘rgazmaning vazifalaridan biri ekanligini taʼkidladi.