2017 yilning 28-29 noyabr kunlari Toshkent shahrida “O‘zbekiston madaniy merosi” multimedia loyihasi doirasida “Tamaddunlar chorrahasi: o‘tmishning buyuk merosi maʼrifatli kelajak asosi” xalqaro media-forumini o‘tkazish rejalashtirilgan.
Tadbirda jahon ilm-fanining yetakchi vakillari, muzeylar, kutubxonalar, ilmiy-tadqiqot institutlari va boshqa xalqaro tashkilotlar rahbarlari, mamlakatimiz olim va ekspertlari ishtirok etadi.
Xalqaro media-forumning asosiy tadbirlaridan biri “Sharq qo‘lyozma yodgorliklari durdonalari” loyihasining yangi turkumi taqdimoti bo‘lib, uning doirasida O‘zbekistonga Rossiya Federatsiyasi Fanlar akademiyasining Sharq qo‘lyozmalari instituti va Fransiya Milliy kutubxonasida saqlanayotgan bebaho qadimiy qo‘lyozmalar faksimile nusxalarini topshirishga bag‘ishlangan tantanali marosim bo‘lib o‘tadi.
Bu qo‘lyozmalarning faksimilelari qo‘l mehnati, maxsus turdagi qog‘oz va haqiqiy oltindan foydalangan holda noyob texnologiyalar yordamida tayyorlangan. Shuningdek, tadbir davomida “O‘zbekiston madaniy merosi jahon to‘plamlarida” loyihasi doirasida nashr etilgan navbatdagi beshta kitob-albom va hujjatli filmlarning taqdimoti bo‘lib o‘tadi. Shu munosabat bilan dunyo va mamlakatimizning eng yirik kutubxona va muzeylariga, taʼlim muassasalariga 2500 dona kitob-albom sovg‘a qilish bo‘yicha insonparvarlik aksiyasi o‘tkaziladi.
Shu bilan birga, Buyuk Britaniya, Fransiya, Rossiya, Turkiya, Chexiya, Yaponiya muzey va kutubxonalari olimlari 2018 yilda yangi albomlar chiqishi haqida maxsus maʼruzalar bilan chiqishadi.