Bu O‘zbekiston Yozuvchilar uyushmasi tomonidan rasman taqdim etilgan Rayevning o‘zbek tilidagi birinchi kitobidir.
Marosim Sulton Rayevga bag‘ishlangan biografik rolik namoyishi bilan boshlandi. Unda ajoyib yozuvchi, o‘nlab asarlar muallifi, baʼzilari teatrlarda sahnalashtirilgan asarlarga mualliflik qilgan adibning hayoti va ijodiy yo‘li haqida hikoya qilindi. Rayevni uning buyuk vatandoshi Chingiz Aytmatov bilan taqqoslashadi va Markaziy Osiyodagi zamonaviy adabiyotning yetakchi yozuvchilaridan biri deb atashadi.
O‘zbekiston Respublikasi Prezidentining maslahatchisi, yozuvchi Xayriddin Sultonov, O‘zbekiston Respublikasi Oliy Majlisi Qonunchilik palatasi Spikeri o‘rinbosari, akademik Akmal Saidov, O‘zbekiston Yozuvchilar uyushmasi raisi Sirojiddin Sayyid, O‘zbekistonda xizmat ko‘rsatgan madaniyat arbobi Zuhriddin Isomiddinov, “Saodat” jurnali bosh muharriri Munavvara Usmonova, filologiya fanlari doktori Jabbor Eshonqul va boshqa taniqli olimlar hamda rasmiy shaxslar tabrik so‘zlari bilan chiqish qildilar.
Notiqlar muallif ijodini, adabiy uslubining sifatini, asarlarining ahamiyatini taʼkidlab, Sulton Rayevning turkiy adabiyotni rivojlantirish, mamlakatlar o‘rtasidagi aloqalarni yo‘lga qo‘yish va mustahkamlashdagi o‘rnini alohida qayd etishdi. Taqdimot davomida yana bir videorolik namoyish etildi, bu safar u Rayevning TURKSOY bosh kotibi sifatidagi faoliyatiga bag‘ishlangan edi.
Sulton Rayevning o‘zi ishtirokchilarga minnatdorchilik bildirib, kitobining o‘zbek kitobxonlari orasida katta qiziqish uyg‘otishiga umid bildirdi.
Rayev qimmatbaho sovg‘alar, jumladan, Alisher Navoiy nomidagi medal va o‘zining portreti bilan taqdirlandi. O‘z navbatida taqdimot mehmonlariga adib va O‘zbekiston Yozuvchilar uyushmasi nomidan kitob topshirildi, fotosessiya va dastxat qo‘yish marosimi o‘tkazildi.
Rasmiy marosim yakunida Rayev o‘z kitobining taqdimoti, shuningdek, bo‘lajak Kongressning ahamiyati haqida fikr bildirdi.
"Men uchun kitob taqdimoti juda muhim voqea. O‘zbekiston teatrlari mening asarlarim asosida spektakllar sahnalashtirgan bo‘lsa-da, o‘zbek adabiy muhitida yozuvchi, nasrnavis-romanist sifatida endi tanishyapti. O‘zbek tili menga juda yaqin, tilni bilaman, o‘zbek adabiyotining eng sara namunalarini o‘qib ulg‘ayganman. O‘ylaymanki, kitob o‘z o‘quvchisini topadi, o‘quvchi esa unda o‘zini ko‘radi. TURKSOY forumining Islom sivilizatsiyasi markaziga bag‘ishlangan Kongress doirasida O‘zbekistonda – maʼnaviyat poytaxtida o‘tkazilishi g‘oyat ramziy maʼnoga ega. Turkiy dunyoning gumanitar islohotlari aynan shu yerdan boshlangan. Islomning barcha buyuk nazariyotchilari turli davrlarda shu zaminda ijod qilganlar. Masalan, Imom Buxoriy – turkiy dunyoning ulug‘ siymosi. O‘zbekiston bunday miqyosdagi tadbirlarni o‘tkazish huquqiga to‘la ega."
Italiyaning "Sandro Teti Editore " nashriyoti prezidenti Sandro Dominiko Teti turli tillardagi adabiyotlarni tarqatish eng muhim vazifa ekanligini taʼkidladi.
"Ayniqsa, G‘arb kishisi nuqtai nazaridan bu juda muhim voqea. Men turkiy adabiyot va TURKSOY bilan yaxshi tanishman, lekin, afsuski, G‘arbda turkiy adabiyot yetarli darajada taqdim etilmagan. Eng muhim vazifa g‘arblik oddiy fuqarolarni turkiy tarix va madaniyat, adabiyot va sheʼriyat bilan tanishtirishdir. Biz ham shu yo‘nalishda harakat qilmoqdamiz. Ilk bor “Boburnoma”ni tarjima qildik. Boshqa kitoblar ustida ham ishlamoqdamiz. Shuning uchun bu taqdimotning ahamiyatini yaxshi tushunaman."