Buxoro yahudiylari va mo‘ltoni-lo‘lilarining o‘ychan chehralari, Xivadagi dorbozlar, ish ustidagi kulollar, bozorlardagi sotuvchilar, zodagonlarning dabdabali portretlari... Ushbu jildda XIX asrning so‘ngi o‘ttiz yili va XX asrning boshlaridagi O‘zbekiston hayotini aks ettiruvchi 150 dan ortiq arxiv fotosuratlari jamlangan. Hozirda bu fotografik hujjatlarning barchasi Rossiya Federatsiyasining turli arxivlarida saqlanmoqda. Turli mavzuviy yo‘nalishdagi (shaharlar va meʼmoriy yodgorliklar, hukmron oqsuyaklarning vakillari, xalqlar va etnik guruhlar, kundalik hayot manzaralariga oid) boblarning har biri maʼlum bir fotokolleksiyaning tarixi, shuningdek, o‘sha davr haqiqatlarini tasvirga tushirgan kishilar haqidagi maqolalar bilan birga berilgan. Fotosuratchilarning o‘zlari ko‘pincha Markaziy Osiyo xalqlari madaniyatining yangi qirralari va hayratlanarli o‘ziga xos jihatlarini kashf etgan kashshof tadqiqotchilarga aylanishgan, inchunin ularning baʼzilari mahalliy tarixchilarning eʼtiboridan chetda qolishi ham mumkin edi. Jildda shuningdek kitobxon Turkiston o‘lkasida fotografiyaning rivoji, uning haqiqiy qiyofasini kelajak avlodlar uchun saqlab qolgan fotograflarning taqdiri bilan ham tanishadi.