Samarqanddagi Registon maydoni XV asrda qurila boshlagan va, katta ehtimol bilan, birinchi binolar Ulug‘bek madrasasi va xonaqohi (so‘fiylar dargohi) bo‘lgan. Madrasadagi yozuvda aytilishicha: ”Bu imorat bilan yer yuzi ziynatlandi, samo esa unga yaqinlashdi va bu yuksak bino asosidan osmonga qarab bo‘y cho‘zdi. Siyosat va ilmda eng mahoratli suyanchiq, davlat saltanati va ilmni o‘zida jamuljam aylagan (Mirzo Ulug‘bek) bu imoratni qurishni buyurdi”. XVII asrda Registon o‘ziga xos o‘quv markaziga aylandi, unda nafaqat shahar aholisi, balki Sharqning o‘nlab musulmon mamlakatlaridan kelganlar ham tahsil oldi. O‘zbekiston mustaqilligi davrida maydonda rekonstruksiya ishlari amalga oshirildi. Rekonstruksiya natijalari ushbu jildda keltirilgan.